బాలీవుడ్ బాద్‌షా షారుఖ్ ఖాన్ ఐపీఎల్‌లో ‘కేకేఆర్’ టీమ్‌కు కో-ఓనర్ అని తెలిసిందే. అయితే, ఆదివారం కేకేఆర్ జట్టు ముంబై ఇండియన్స్‌తో తలపడగా.. సచిన్ కొడుకు అర్జున్ టెండూల్కర్ తన ఫస్ట్ మ్యాచ్ ఆడాడు. ఈ క్రమంలోనే ఐపీఎల్‌లో అతని ఎంట్రీ గురించి షారుఖ్ స్పెషల్‌గా ట్వీట్ చేశాడు.
ప్రధానాంశాలు:
- అర్జున్ టెండూల్కర్‌పై షారుఖ్ ఖాన్ ట్వీట్
- ఐపీఎల్‌లో కేకేఆర్‌పై ఎంట్రీ ఇచ్చిన అర్జున్
- గర్వకారణమంటూ కింగ్ ఖాన్ స్పెషల్ నోట్
లెజెండరీ క్రికెటర్, గాడ్ ఆఫ్ క్రికెట్‌గా పిలువబడే సచిన్ టెండూల్కర్ (Sachin Tendulkar) తనయుడు అర్జున్ టెండూల్కర్ (Arjun Tendulkar) ఐపీఎల్‌లో ఫస్ట్ మ్యాచ్ ఆడాడు. ఆదివారం ముంబై (Mumbai Indians), కోల్‌కతా (KKR) జట్ల మధ్య జరిగిన మ్యాచ్‌లో అతను ముంబై తరపున బరిలో దిగాడు. రెండు ఓవర్లు బౌలింగ్ చేసిన అర్జున్.. 17 పరుగులిచ్చి వికెట్ తీయలేకపోయాడు. ఇదిలా ఉంటే, అర్జున్ అపోజిట్ టీమ్ ‘కోల్‌కతా నైట్ రైడర్స్‌’కు (Kolkata Night Riders) కింగ్ ఖాన్ షారుఖ్ (Shah Rukh Khan) సహ యజమానని తెలిసిందే. అయితే, సచిన్ టెండూల్కర్ తనకు మంచి ఫ్రెండ్ అయినందున.. అతని కొడుకు అర్జున్ కోసం సోమవారం స్పెషల్ నోట్ షేర్ చేశాడు షారుఖ్. అర్జున్ ఐపీఎల్ డెబ్యూ (IPL Debut) చూడటం తండ్రి సచిన్కు గర్వకారణమని పేర్కొన్నాడు.
షారూఖ్ ట్వీట్ విషయానికొస్తే.. ‘ఈ ఐపీఎల్‌లో ఎంత పోటీ అయినా ఉండవచ్చు. కానీ ఫ్రెండ్ కొడుకు అర్జున్ టెండూల్కర్ మైదానంలోకి దిగడం చూడటం అనేది చాలా ఆనందాన్నిచ్చే విషయం. అర్జున్‌కు నా శుభాకాంక్షలు. అలాగే ఇది గర్వపడే క్షణం సచిన్’ అంటూ ట్వీట్ చేశాడు. ఇక ఈ ట్వీట్ చూసిన నెటిజన్లు షారుఖ్ గెశ్చర్‌ను ప్రశంసిస్తున్నారు. అర్జున్ ఐపీఎల్ డెబ్యూ సందర్భంగా ప్రతి ఒక్కరూ సచిన్కు అభినందనలు తెలపడం చాలా బాగుందని కామెంట్ చేస్తు్న్నారు. అయితే ముంబైలోని వాంఖడే స్టేడియంలో ఆదివారం జరిగిన ఈ మ్యాచ్‌లో షారూఖ్ కనిపించలేదు. కానీ అతని కుమార్తె సుహానా ఖాన్ స్టేడియంలో కేకేఆర్ టీమ్‌ను ఉత్సాహపరుస్తూ కనిపించింది. ఆమెతో సోదరుడు అబ్రామ్ ఖాన్ కూడా ఉన్నాడు.
