నేడు ఉపాధ్యాయుల దినోత్సవం (Teachers Day) సందర్భంగా అల్లు అర్జున్ వీడియో ఒకటి సోషల్ మీడియాలో వైరల్ అవుతోంది. తనకు మూడో తరగతిలో పాఠాలు చెప్పిన టీచర్ ఒక్కసారిగా తన ముందుకు రావడంతో ఆశ్చర్యపోయిన అల్లు అర్జున్ (Allu Arjun).. ఆనందంలో ఆమె కాళ్లకు మొక్కి ఆశీర్వాదం తీసుకున్నారు.
ప్రధానాంశాలు:
- అల్లు అర్జున్‌కు పాఠాలు చెప్పిన అంబికా రామకృష్ణన్
- అవార్డుల ఫంక్షన్‌లో వేదికపైకి వచ్చిన అంబిక
- 30 ఏళ్ల తర్వాత టీచర్‌ను చూసి ఆశ్చర్యపోయిన బన్నీ
అల్లు అర్జున్‌కి (Allu Arjun) గర్వం ఎక్కువని.. ఆయన యాటిట్యూడ్ చూపిస్తూ ఉంటారని కొందరు సోషల్ మీడియాలో విమర్శలు చేస్తూ ఉంటారు. ఆయనపై ట్రోల్స్ వేస్తూ ఉంటారు. కానీ, అల్లు అర్జున్‌కు పెద్దలంటే ఎంత గౌరవమో చెప్పే దృశ్యమిది. తనకు మూడో తరగతిలో పాఠాలు చెప్పిన టీచర్ 30 ఏళ్ల తర్వాత కనిపించగానే ఆమె కాళ్లకు నమస్కారం చేసేంత సంస్కారం ఉన్న వ్యక్తి బన్నీ. అందుకే, ఈ ఉపాధ్యాయుల దినోత్సవం నాడు బన్నీ గొప్పతనాన్ని తెలియజేస్తూ ఆ పాత వీడియో సోషల్ మీడియాలో వైరల్ అవుతోంది.
పూర్వం తెలుగు సినీ పరిశ్రమ మద్రాసు (చెన్నై)లో ఉన్న సంగతి తెలిసిందే. కాబట్టి తెలుగు నటీనటులు కూడా చెన్నైలోనే ఉండేవారు. అక్కడే స్థిరపడిపోయిన తెలుగు నటీనటులు చాలా మందే ఉన్నారు. అయితే, టాలీవుడ్ హైదరాబాద్‌కు షిఫ్ట్ అయిన తరవాత చాలా మంది నటీనటులు ఇక్కడికి వచ్చేశారు. అలా వచ్చేసిన సినీ కుటుంబాల్లో అల్లు ఫ్యామిలీ ఒకటి. అల్లు ఫ్యామిలీ మద్రాసులో ఉన్నప్పుడే బన్నీ జన్మించారు. అక్కడే పెరిగారు. కాబట్టి బన్నీ స్కూలింగ్ మద్రాసులోనే జరిగింది.
అల్లు అర్జున్ మద్రాసులో చదువుకునేటప్పుడు మూడో తరగతిలో అంబికా రామకృష్ణన్ అనే టీచర్ పాఠాలు చెప్పారు. ఈ టీచర్ అంటే అల్లు అర్జున్‌కు ఎంతో ఇష్టం. బన్నీకి చదువు పెద్దగా ఎక్కేది కాదు. అయినప్పటికీ అంబికా టీచర్ ఆయన్ని ఏమీ అనేవారు కాదట. ప్రతి ఒక్కరికీ ఏదో ఒక విషయంలో టాలెంట్ ఉంటుందని.. నీలో ఉన్న టాలెంట్‌ను నువ్వే గుర్తించాలని ఆమె చెప్పేవారట. అలా తనను ఎంతగానో ప్రోత్సహించిన తన చిన్ననాటి టీచర్ అంటే బన్నీకి ఎంతో ఇష్టం. అలాంటి టీచర్ 30 ఏళ్ల తర్వాత బన్నీ ముందుకు వచ్చారు.
మూడు నెలల క్రితం చెన్నైలో బిహైండ్‌వుడ్స్ గోల్డ్ ఐకాన్స్ అవార్డుల ఫంక్షన్ జరిగింది. ఈ ఫంక్షన్‌లో అల్లు అర్జున్ పాల్గొన్నారు. ఏఆర్ రెహమాన్ చేతుల మీదుగా అవార్డు అందుకున్నారు. ఈ సమయంలో వేదిక మీదికి అంబికా రామకృష్ణన్ వచ్చారు. ఆమెను చూసి ఆశ్చర్యపోయిన అల్లు అర్జున్.. తన చిన్ననాటి ఉపాధ్యాయురాలి కాళ్లకు నమస్కారం చేశారు. ఆమె ఆశీర్వాదం తీసుకున్నారు. ఈ సందర్భంగా అల్లు అర్జున్ మాట్లాడుతూ తన టీచర్ గురించి చాలా గొప్పగా చెప్పుకొచ్చారు. అలాగే, అల్లు అర్జున్ ఇంత గొప్ప స్థాయికి ఎదగడం తనకు ఎంతో ఆనందంగా ఉందని అంబిక అన్నారు. తన విద్యా జీవితంలో ఎంతో మంది టీచర్లను చూశానని.. కానీ తనకు ఎంతో ఇష్టమైన నంబర్ వన్ టీచర్ మాత్రం అంబికా మేడమ్ అని బన్నీ వెల్లడించారు.
అయితే, ఈ రోజు టీచర్స్ డే సందర్భంగా ఈ వీడియో సోషల్ మీడియాలో వైరల్ అవుతోంది. ఉపాధ్యాయుల పట్ల అల్లు అర్జున్‌కు ఉన్న గౌరవం, భక్తి చూడండంటూ ఆయన అభిమానులు కామెంట్లు చేస్తున్నారు.
