అర్థరాత్రి క్రిమినల్స్ హంగామా…
రంగంలోకి దిగిన పోలీసులు
దిశ దశ, మానకొండూరు:
ఓ క్రిమినల్ పై దాడి చేసేందుకు మరో క్రిమినల్ మూఠా రంగంలోకి దిగింది. నేర ప్రవృత్తితోనే మమేకం జీవనం సాగిస్తున్న ఒకరిపై మానకొండూరులో బుధవారం అర్థరాత్రి దాడి జరిగింది. ఈ సమాచారం అందుకున్న పోలీసులు హుటాహుటిన రంగంలోకి దిగడంతో నిందితులు పరార్ అయినట్టు సమాచారం. సంఘటనా వివరాల్లోకి వెల్తే పీడీ యాక్టు నమోదై ఇటీవల కమిషనరేట్ లోని కొన్ని ప్రాంతాల్లో బహిష్కరణకు గురైన అరుణ్ అనే వ్యక్తిపై బుధవారం రాత్రి ఓ ముఠా దాడికి పాల్పడినట్టు స్థానికులు చెప్తున్నారు. అరుణ్ పై గన్ తో కాల్చే ప్రయత్నం చేయగా అతను తప్పించుకున్నాడని, అతన్ని తీవ్రంగా చితకబాధడంతో పాటు అడ్డుకున్న వారిపైనా దాడి చేశారని వివరించారు. అయితే ఈ ఘటన జరుగుతున్న సమాచారం అందుకున్న మానకొండూరు పోలీసులు హుటాహుటిన అక్కడకు చేరుకోగా నిందితుల్లో కొంతమంది తప్పించుకోగా ఒక్కరు మాత్రం పోలీసులకు చిక్కినట్టు తెలుస్తోంది. అయితే మిగతా వారిని కూడా అదుపులోకి తీసుకునేందుకు మానకొండూరు పోలీసులు గాలింపు చర్యలు ముమ్మరం చేసినట్టు సమాచారం. ఈ ఘటనకు సంబంధించిన పూర్తి వివరాలు తెలియాల్సి ఉంది.
