ఆంధ్రప్రదేశ్ రాష్ట్ర క్రియేటివిటీ అండ్ కల్చర్ కమిషన్ క్రియేటివ్ హెడ్‌గా.. టాలీవుడ్ కమెడియన్ జోగి నాయుడు నియమితులైన సంగతి తెలిసిందే. దీనిపై నటుడు, నిర్మాత బండ్ల గణేశ్ స్పందించారు. జగన్ గారిని నమ్ముకున్నందుకు జోగి నాయుడుకు సైతం పదవి దక్కింది. ఆల్ ది బెస్ట్ తమ్ముడు అంటూ బండ్ల గణేశ్ ట్వీట్ వేశారు. ప్రస్తుతం ఈ ట్వీట్ సోషల్ మీడియాలో వైరల్ అవుతోంది.
బండ్ల గణేశ్‌పై నెటిజన్లు రకరకాలుగా స్పందిస్తున్నారు. కొందరైతే బండ్ల గణేశ్‌ను ఏకిపారేస్తున్నారు. త్రివిక్రమ్ బండ్ల గణేశ్‌ను ఎందుకు రానివ్వలేదో ఇప్పుడు అర్థం అయింది అని ఒకరు.. కళ్యాణ్ గారు కొందరిని దూరంగా ఉంచడమే మంచింది. ఊసరవెల్లి కంటే వేగంగా రంగులు మారుస్తున్నారు అని మరొకరు కామెంట్ చేశారు.
ఆంధ్రప్రదేశ్ క్రియేటివిటీ అండ్ కల్చర్ కమిషన్ క్రియేటివ్ హెడ్‌గా కమెడియన్ ఎల్‌.జోగి నాయుడుని ప్రభుత్వం నియమించింది. ఈ మేరకు ప్రభుత్వ ప్రత్యేక కార్యదర్శి డాక్టర్‌ రజత్‌ భార్గవ ఉత్తర్వులు జారీ చేశారు. అనకాపల్లి జిల్లా నర్సీపట్నం డివిజన్‌లోని చెర్లోపాలెం గ్రామానికి చెందిన జోగినాయుడు చలనచిత్ర నటుడిగా 150కి పైగా చిత్రాలలో నటించారు. చిత్ర, టెలివిజన్‌ రంగాలలోని పలు విభాగాలలో దాదాపు 25 ఏళ్ల అనుభవం ఉంది. వైఎస్సార్‌సీపీ ఆవిర్భావం నుంచి పార్టీలో కొనసాగుతున్నారు. జోగి నాయుడు నియామకానికి సంబంధించి ఏపీ స్టేట్‌ క్రియేటివిటీ అండ్ కల్చర్ కమిషన్ విజయవాడ చీఫ్‌ ఎగ్జిక్యూటివ్‌ ఆఫీసర్‌ తదుపరి చర్యలు చేపట్టనున్నారు.
