ఇటలీలో ఘోర బోటు ప్రమాదం జరిగింది. కాలాబ్రియాలోని తీరప్రాంత పట్టణం క్రోటోన్ సమీపంలోని అయోనియన్ సముద్రంలో పడవ మునిగి 30 మంది మరణించారు. మృతదేహాలను స్వాధీనం చేసుకున్నట్లు అధికారులు తెలిపారు. ఈ ప్రమాదంలో దాదాపు 40మంది ప్రయాణికులు బయటపడినట్లు తెలుస్తోంది. ప్రమాద సమయంలో బోటులో 100 మంది వలసదారులు ఉన్నారు. కోస్టు గార్డు, పోలీసులు, అగ్నిమాపక సిబ్బంది సహాయక చర్యల్లో పాల్గొన్నారు.
బోటు ప్రమాద ఘటనాస్థలికి చేరుకున్న రెస్క్యూ టీమ్ సహాయక చర్యలు ముమ్మరంగా కొనసాగిస్తున్నాయి. మృతుల్లో నెలల చిన్నారి కూడా ఉన్నట్లు అధికారులు వెల్లడించారు. అయితే పడవపై వలస వచ్చిన వారు ఏ దేశస్థులో ఇంకా తెలియలేదని చెప్పారు. పడవ ఎక్కడ నుంచి వచ్చిందో కూడా తెలియరాలేదని స్పష్టం చేశారు.
కాగా, గతేడాది అక్టోబరులో నైజీరియాలో జరిగిన పడవ ప్రమాదంలో 76 మంది మరణించారు. మరికొందరు గల్లంతయ్యారు. 85 మందితో వెళ్తున్న పడవ ఒగ్బారూ ప్రాంతంలో వరదల కారణంగా ఒక్కసారిగా మునిగిపోయింది. ప్రమాదంపై సమాచారం అందిన వెంటనే అధికారులు సహాయక చర్యలు చేపట్టారు. జాతీయ విపత్తు నిర్వహణ సంస్థ ఇతర విభాగాల సిబ్బందిని రంగంలోకి దింపారు. గల్లంతైన వారి కోసం గాలించి 76 మృతదేహాలను వెలికితీశారు. ఈ బోటు ప్రమాదంపై నైజీరియా అధ్యక్షుడు ముహమ్మద్ బుహారీ విచారం వ్యక్తం చేశారు. మృతుల కుటుంబాలకు ప్రగాఢ సానుభూతి తెలియజేశారు. భవిష్యత్లో ఇలాంటి ప్రమాదాలు జరగకుండా తగిన భద్రతా ప్రమాణాలు పాటించేలా చూడాలని అధికారులను ఆదేశించారు.
Boat capsize in the sea.. 30 people died
