జగిత్యాల ఆర్టీసీ డిపోలో ప్రమాదం
దిశ దశ, జగిత్యాల:
జగిత్యాల జిల్లా కోరుట్ల ఆర్టీసీ బస్సు డిపోలో ప్రమాదం సంభవించింది. ప్రమాదవశాత్తు నిప్పంటుకోవడంతో రాజధాని ఏసీ బస్సులో మంటలు చెలరేగడంతో పూర్తిగా దగ్దం అయింది. హైదరాబాద్ నుండి కోరుట్లకు ప్రయాణీకులను తరలించిన తరువాత డిజిల్ కోసం డిపోకు బస్సును తీసుకెళ్లారు. డిపోలోని బంకు వద్ద బస్సును నిలిపివేసిన డ్రైవర్ బయటకు వెళ్లిపోయారు. ఆ తరువాత బంకు సిబ్బంది డిజిల్ ఫిల్ చేసిన కొద్ది సేపటికి అకస్మాత్తుగా బస్సులోపల నుండి మంటలు చెలరేగాయి. దీంతో అప్రమత్తమైన ఆర్టీసీ సిబ్బంది ఫైర్ ఇంజన్ ను రప్పించి మంటలు ఆర్పడంతో భారీ ప్రమాదం తప్పింది. లేనట్టయితే బస్సులోని మంటలు మరింత వ్యాపించినట్టయితే డిపో మొత్తం దగ్దం కావడంతో పాటు బంకు కూడా మంటల్లో చిక్కుకుని పోయేది. దీంతో కోరుట్ల పట్టణంలో భారీ నష్టాన్ని చవి చూడాల్సి వచ్చేది. ఆర్టీసీ బస్సులో మంటలు చెలరేగిన వెంటనే యంత్రాంగం రంగంలోకి దిగి ఫైర్ ఇంజన్ సాయంతో మంటలు ఆర్పడంతో ఒక్క బస్సు మాత్రమే దగ్దం అయింది. ఆర్టీసీ అధికారులు హఠాత్తుగా బస్సు ఎలా దగ్దం అయింది అన్న విషయంపై ఆరా తీసే పనిలో నిమగ్నం అయ్యారని సమాచారం.
