పరిగిలో పట్టుకున్న పోలీసులు
దిశ దశ, వికారాబాద్:
సంక్రాంతి పండుగ వచ్చిందంటే కోనసీమ గుర్తుకు వస్తుంది అందరికీ. అక్కడ కోడి పందెలు పెద్ద ఎత్తున సాగుతాయి. తరతరాలుగా సాగుతున్న కోడి పందాల్లో రూ. కోట్లలో బెట్టింగ్ జరుగుతుందన్న ప్రచారం కూడా ఉంది. అయితే ఇప్పటి వరకు కోనసీమ ప్రాంతంలో జరిగే కోడి పందాలా గురించి మాత్రమే విన్నాం కానీ… రాయలసీమ ప్రాంతంలో పావురాలతో కూడా పందెం కాసే ఆచారం కొనసాగుతోందని చాలా మందికి తెలియకపోవచ్చు. తాజాగా వికారాబాద్ జిల్లా పరిగి వద్ద పావురాలను పట్టుకోవడంతో ఈ బెట్టింగ్ వ్యవహారం వెలుగులోకి వచ్చింది. కోనసీమలో కోళ్ల కాళ్లకు కత్తులు కడితే… రాయలీస పావురాలకు మాత్రం ట్రాకింగ్ చిప్స్, ట్యాగ్స్ అమర్చారు. రెండు కోళ్ల మధ్య పోరు జరిగితే… వందల పావురాల మధ్య రన్నింగ్ రేస్ జరుగుతోంది.
వందల సంఖ్యలో…
వికారాబాద్ జిల్లా పరిగికి శనివారం రాత్రి భారీ ఎత్తున పావురాలను తరలించారు. వాటి కళ్లకు ట్యాగ్ చేసి ఉన్న విషయాన్ని గమనించిన స్థానికులు పోలీసులకు సమాచారం అందించారు. 250 వరకు పావురాలను పట్టుకోగా మరో 30 పావురాలు గాల్లోకి ఎగిరేసినట్టుగా పోలీసులు తెలిపారు.
బెట్టింగ్ కోసమేనా…
ఏపీలోని సత్యసాయి జిల్లా గోరట్ల నుండి తరలించిన ఈ పావురాలను పరిగి వద్ద వదిలేస్తే అవి ఎగురుకుంటూ గోరట్లకు చేరుకుంటాయి. వీటిలో ఏ పావురం అయితే ముందు గమ్యానికి చేరుకుంటుందో దానికి మొదటి బహుమతి ప్రకటిస్తారు. నిర్వాహకులు. అయితే వీటికి గోరట్ల వద్ద ప్రత్యేకంగా శిక్షణ ఇచ్చిన తరువాతే వీటిచే పోటీ నిర్వహిస్తున్నట్టుగా పోలీసుల విచారణలో తేలింది. 100, 200, 300 కిలో మీటర్ల మేర పందెం ఏర్పాటు చేసి పావురాలచే పోటీ నిర్వహిస్తుంటారు. పరిగి నుండి గోరట్ల వరకు 300 కిలో మీటర్ల దూరం ఉండడంతో ఇక్కడి నుండి పావురాలను ఎగిరేసేందుకు సమాయత్తం అయ్యారు నిర్వాహాకులు. పావురాలకు ట్రాకింగ్ చిప్స్, కోడ్ ట్యాగ్స్ కూడా ఏర్పాటు చేసి పోటీలకు సిద్దం చేశారు. స్థానికులు వీరిని గమనించి పోలీసులకు ఫిర్యాదు చేయడంతో పావురాలను తరలించిన వాహనాన్ని నిర్వహాకులను పోలీసులు అదుపులోకి తీసుకున్నారు.
అంత దూరం..?
వికారాబాద్ జిల్లా పరిగి వరకు 250 పావురాలను నిర్వాహాకులు ఎలా తరలించారన్నదే అంతు చిక్కకుండా పోతోంది. సత్యసాయి జిల్లా నుండి హైవే మీదుగా వస్తున్న ఈ వాహనం సరిహద్దుల్లో అధికారుల కళ్లుగప్పి తెలంగాణాలోకి ఎలా రాగలిగిందన్నది పజిల్ గా మారింది. వందల పావురాలను వాహనంలో తరలించడమే కాకుండా వాటికి ట్యాగింగ్ కూడా చేసి ఉన్నప్పటికీ ఏ ఒక్కరి దృష్టిలో పడకుండా పరిగి వరకు చేరుకోవడం ఎలా సాధ్యం అయిందన్నదే అంతు చిక్కకుండా పోతోంది. నిర్వాహాకులపై వైల్డ్ ఎనిమల్ యాక్ట్, బెట్టింగ్ యాక్టులపై కేసు నమోదు చేశామని పోలీసులు తెలిపారు.
