దిశ దశ, హైదరాబాద్:
సంక్రాతి పర్వదినం సందర్భంగా వేసే రంగవల్లుల ద్వారా కూడా రాజకీయ పార్టీలు తమ ప్రచారాన్ని కొనసాగిస్తున్నాయి. తెలంగాణాలో కాంగ్రెస్ ఆరు గ్యారెంటీలకు సంబంధించిన ముగ్గులు, ఆంధ్రాలో ‘సూపర్ సిక్స్’ అంటూ టీడీపీ అభిమానులు వినూత్నంగా ప్రచారం చేస్తున్నారు. జగిత్యాల జిల్లా పెగడపల్లి మండలం వెంగాలాయి పేటకు చెందిన సుమలత ఆదివారం ఆరు గ్యారెంటీల ముగ్గు వేసి అందరి దృష్టిని ఆకర్షించిన సంగతి తెలిసిందే.
నేడు మరోకరు…
అయితే తాజాగా జగిత్యాల జిల్లాకు చెందిన అభిమానులు మరో ఫోటోను వైరల్ చేస్తున్నారు. వెంగలాయిపేటకు చెందిన సుమలత వేసిన ఆరు గ్యారెంటీల ముగ్గులో జై కాంగ్రెస్, జై రేవంత్ రెడ్డి, జై అడ్లూరి లక్ష్మణ్ కుమార్ అంటూ నినాదాలు రాశారు. అయితే సోమవారం వైరల్ అవుతున్న ఫోటోల్లో ప్రజా పాలనలో సంక్రాంతి సంబరాలు, జై రేవంత్ రెడ్డి, జై జీవన్ రెడ్డి, జై లక్ష్మణ్ కుమార్ అని రాశారు. తెలంగాణ ప్రభుత్వం అమలు చేయనున్న ఆరు గ్యారెంటీలకు సంబంధించిన వివరాలను పొందుపర్చి ఆకర్షణీయంగా ఈ ముగ్గు వేశారు. ఈ రంగవల్లికి సంబంధించిన ఫోటోలు నెట్టింట వైరల్ అవుతున్నాయి. జగిత్యాల జిల్లాలోని సోషల్ మీడియా వేదికల్లో ఈ ఫోటో చక్కర్లు కొడుతోంది. కాంగ్రెస్ పార్టీ అధికారంలోకి వచ్చేందుకు ఇచ్చిన ఆరు గ్యారెంటీల గురించి గ్రామీణ స్థాయిలో ప్రచారం చేసేందుకు మహిళా అభిమానులు చొరవ చూపిస్తుండడం విశేషం.
ఏపీలో…
ఇకపోతే ఏపీలో కూడా టీడీపీ అభిమానులు రంగవల్లులతో టీడీపీని ప్రమోట్ చేస్తున్నారు. వచ్చే అసెంబ్లీ ఎన్నికల్లో నారా చంద్రబాబు నాయుడు ముఖ్యమంత్రి కావాలన్న లక్ష్యంతో ఉన్న తెలుగుదేశం పార్టీ అభిమానులు ‘సూపర్ సిక్స్’ పథకాలను వివరిస్తూ ముగ్గులు వేశారు. ఇందులో బాబు ష్యూరిటీ, భవిష్యత్తు గ్యారెంటీ అన్న నినాదంతో పాటు టీడీపీ ఇస్తున్న వాగ్దానాలకు సంబంధించిన వివరాలను కూడా పొందుపర్చారు. ఈ ఫోటోలు కూడా సోషల్ మీడియా వేదికల్లో వైరల్ అవుతున్నాయి. చంద్రబాబు నాయుడు అధికారంలోకి రాగానే చేపట్టనున్న ఆరు గ్యారెంటీలు అమలు చేస్తారంటూ టీడీపీ మహిళా అభిమానులు ఈ ముగ్గులు వేయడం గమనార్హం.
