దిశ దశ, హుజురాబాద్:
ఆధార్ కార్డులో మార్పులు చేర్పులు చేసుకోవాలన్నా, అప్ డేట్ చేసుకోవాలన్నా ఎన్నో రకాల ఇబ్బందులు ఎదురవుతున్న సంగతి తెలిసిందే. ఇలాంటి సమస్యలకు చెక్ పెట్టేందుకు, సత్వర సేవలందించేందుకు ప్రత్యేకంగా శాశ్వత ఆధార్ కేంద్రాన్ని ఏర్పాటు చేశారు. హుజురాబాద్ పట్టణంతో పాటు సమీపంలోని గ్రామాలకు చెందిన వారి సౌలభ్యం కోసం స్థానిక హెడ్ పోస్టాఫీస్ లో కొత్తగా సెంటర్ ఏర్పాటు చేశారు. శాశ్వత ఆధార్ కేంద్రాన్ని మంగళవారం పోస్ట్ మాస్టర్ యు మహేందర్ ప్రారంభించారు. ఈ సెంటర్ లో ఆధార్ నమోదు, ఆధార్ కార్డులో సవరణలు, డిమోగ్రాఫిక్, పేరు, పుట్టిన తేది, వయస్సు, లింగము, అడ్రస్, మొబైల్ నంబరు, ఈమెయిల్, బయోమెట్రిక్, ఫోటో, వేలిముద్రలు, కనుపాపలకు సంబంధించిన మార్పులు చేర్పులు చేసుకోవచ్చని వివరించారు. అయితే ఇందుకు సంబంధించిన ఒరిజినల్ పత్రాలను శాశ్వత ఆధార్ సెంటర్ లో చూపించాల్సి ఉంటుందని పోస్ట్ మాస్టర్ వెల్లడించారు. ప్రస్తుతం అన్ని అంశాలు కూడా ఆధార్ తో ముడిపడి ఉన్న నేపథ్యంలో శాశ్వత ఆధార్ సెంటర్ హుజురాబాద్ పోస్ట్ ఆఫీసులో ఏర్పాటు చేయడం వల్ల అందుబాటులోకి సేవలు వచ్చినట్టయిందన్నారు. ఇక నుండి ఆధార్ సంబంధిత అంశాల గురించి హుజురాబాద్ పోస్ట్ ఆఫీసుకు నేరుగా రావచ్చని మహేందర్ సూచించారు.
