విలక్షణమైన పాత్రలతో సాధించిన రికార్డులే కాదు ఆయన తెరపై కనిపించిన చిత్రాల్లోనూ రికార్డు సాధించారు. వైవిద్యమైన నటనతో తెలగు ప్రేక్షకులను ఆరు దశాబ్దాల పాటు అలరారించిన మహా నటుడు ఇప్పటి వరకు 777 సినిమాల్లో నటించారంటే ఆయన కళారంగానికి అందించిన సేవలు ఏ పాటివో అర్థం చేసుకోవచ్చు.
ఎన్టీరామారావుతో…
సీనియర్ ఎన్టీఆర్ తో కలిసి అత్యధిక సినిమాల్లో నటించిన రికార్డు కూడా ఆయన సొంతమే అయింది. ఒకటి కాదు రెండు కాదు ఏకంగా వంద సినిమాల్లో సీనియర్ ఎన్టీఆర్ తో కలిసి నటించారు. కైకాలలో సీనియర్ రామారావు పోలికలు ఉండడం కూడా ఆయనకు కలిసొచ్చిన అంశంగా చెప్తుంటారు సిని ప్రముఖులు. దక్షిణాది రాష్ట్రాల్లో వీరిద్దరి కాంబినేషన్ లో విడుదలైన మూవీల సంఖ్య రికార్డనే చెప్పాలి. రామారావుకు డూప్ గా నటించిన సందర్భాలు కూడా ఆయన సొంతమనే చెప్పాలి. మొదట హిరోగా వెండితెరపై కనిపించినా ఆ తరువాత వివిధ రకాల క్యారెక్టర్ ఆర్టీస్టుగా స్థిరపడిపోయిన ఆయన తగ్గిపోయానన్న ఫీలింగ్ కు దూరంగా ముందుకు సాగడం వల్లే ఆయన చరిత్ర సృష్టించారు.
మూడు తరాల్లో..
చిత్తూరు నాగయ్య హయాం నుండి జూనియర్ ఎన్టీ రామారావు వరకు తెరపై కనిపించిన కైకాల మూడు తరాల వారితోనూ సినిమాల్లో నటించడం కూడా అరుదే. సీనియర్ రామారావు, బాలకృష్ణ, జూనియర్ ఎన్టీ రామారావులతో కలిసి నటించిన రికార్డు కూడా ఆయన అందుకోవడం విశేషం.
అన్ని రకాల మూవీలు
పౌరాణిక, సాంఘీక, జానపద చిత్రాల్లోనూ నటించిన అత్యంత అరుదైన నటుల్లో కైకాల ఒకరు. సినిమాల్లో ఎన్నో రకాల క్యారెక్టర్లతో కనిపించిన ఆయన మూడు రకాల సినిమాల్లోనూ పాత్రలు వేసి ప్రేక్షకుల మన్ననలు అందుకున్నారు. విభిన్నమైన పాత్రలకు జీవం పోయడమే కాకుండా అన్ని రకాల సినిమాల్లో నటించిన రికార్డు కూడా ఆయన సొంతమేనని చెప్తుంటారు సిని విమర్శకులు.
