సినీ నటుడు, నిర్మాత బండ్ల గణేశ్ తెలంగాణ సీఎం కేసీఆర్‌పై ప్రశంసలు కురిపించారు. ఇవాళ కుటుంబ సమేతంగా యాదాద్రి లక్ష్మీ నరసింహ స్వామివారిని బండ్ల గణేశ్ దర్శించుకున్నారు. ఈ సందర్భంగా సీఎం కేసీఆర్‌‌ను ప్రశంసిస్తూ గణేశ్ వరుస ట్వీట్లు చేశారు. తెలంగాణ సీఎం కేసీఆర్ అమూల్యమైన సేవలు ఈ దేశానికి అవ‌స‌రమని బండ్ల గణేశ్ ట్వీట్ చేశారు. యాదగిరి నరసింహస్వామి ఆల‌యం చూసిన తర్వాత ఈ రాష్ట్రాన్నే కాదు.. దేశాన్ని కూడా అద్భుతమైన ప్రగతి పథం వైపు న‌డిపించే స‌త్తా, సామ‌ర్థ్యం కేసీఆర్‌కు ఉన్నాయ‌ని పూర్తిగా న‌మ్ముతున్నాను అని వ్యాఖ్యానించారు.
యాదాద్రి ఆలయాన్ని భూతల స్వర్గంగా తీర్చిదిద్దిన మహోన్నత వ్యక్తి కేసీఆర్‌కు తెలంగాణ రాష్ట్ర ప్రజల తరఫున నా హృదయపూర్వక కతజ్ఞతలు. తెలంగాణ అద్భుతమైన ప్రగతి పథం వైపు దూసుకుపోతుంది అని చెప్పటానికి ఈ యాదగిరిగుట్ట నరసింహస్వామి ఆలయ అభివృద్ధి ఓ నిదర్శనం. కేసీఆర్ ఆలోచన, ఆచరణ ఇవే కాకుండా వాటిని నిర్మిస్తున్న ప్రాజెక్టులు గాని ఆయన ఆలోచన విధానంగానీ మహా అద్భుతంగా తృప్తి చెందాను. చాలా సంతోషం అనిపించింది. ముఖ్యమంత్రి గారు మీకు హృదయపూర్వకంగా కృతజ్ఞతలు, అభినందనలు తెలియజేయలేకుండా ఉండలేక పోతున్నాను అంటూ బండ్ల గణేశ్ ట్వీట్ చేశారు.
తెలంగాణ రాష్ట్రానికే గాక భారతదేశం మొత్తానికి మీ అమూల్యమైన సేవలు అందించాలని మనస్ఫూర్తిగా కోరుకుంటున్నాను. ఇవాళ భారతదేశంలోనే అతి చిన్న రాష్ట్రమైన మన తెలంగాణను నంబర్ వన్ రాష్ట్రంగా తీర్చిదిద్దటంలో మీ ఆలోచన విధానం, మీ కఠోర తపస్సు, మీ ముక్కుసూటితనం ఎంతో ఉపయోగపడింది, ఆనందాన్నిస్తుంది. నరసింహస్వామిని చూసిన తర్వాత ఆ స్వామివారి కటాక్షం ఎప్పుడు మీపై ఉండాలని, ఎల్లవేళలా ఆ స్వామివారి ఆశీస్సులు మీ మీద ఉండాలని మా ప్రజలందరి పైన ఉండాలని కోరుకుంటున్నానని తెలిపారు.
ఏ స్వార్థం కోసమో.. ఏ లబ్ధి కోసమో మీ దగ్గర ఏది ఆశించో నేను చెప్పట్లేదు. నా మనసులోని మాటలు చెప్తున్నాను. మంచి చేస్తే మంచి అని చెప్తాను, లేకపోతే మౌనంగా ఉంటాను. అది నా నైజం సార్..! మీరు అద్భుతం, యువర్ ఏ వండర్ ఫుల్, యువర్ ఫీచర్ ఆఫ్ ఇండియా.. లవ్ యు కేసీఆర్ గారు అంటూ బండ్ల గణేశ్ త‌న ట్వీట్ల‌లో పేర్కొన్నారు.
