కరీంనగర్ లో అనూహ్య పరిణామాలు
దిశ దశ, కరీంనగర్:
రాష్ట్ర మంత్రి పొంగులేటి శ్రీనివాస్ రెడ్డి కలెక్టర్ పమేలా సత్పతిపై అసహనం వ్యక్తం చేయడంపై విమర్శలు వెల్లువెత్తుతున్నాయి. కాంగ్రెస్ పార్టీ మాజీ నేత బక్క జడ్సన్ జాతీయ మహిళా కమిషన్ కు ఫిర్యాదు చేశారు. ఎమ్మెల్సీ కల్వకుంట్ల కవిత కూడా ఈ అంశంపై స్పందించారు. అయితే ప్రముఖుల పర్యటనలో కలెక్టర్ పమేలా సత్పతితో మంత్రి చేసిన కామెంట్స్ ఆమెను మనో వేదనకు గురి చేస్తున్నట్టుగా ఉంది. కేంద్ర, రాష్ట్ర మంత్రుల టూర్ కావడంతో ప్రతి అన్ని రకాలా జాగ్రత్తలు తీసుకున్నప్పటికీ మంత్రి శ్రీనివాస్ రెడ్డి పట్ల గన్ మెన్లు వ్యవహరించిన తీరుతో ఆయన కోపం ప్రదర్శించారు. అయితే ఆయన అక్కడే ఉన్న కలెక్టర్ పై మండిపడిన తీరును చాలామందిని విస్మయ పరిచింది.
షేర్ డిలిట్…
శనివారం ఇన్ స్టాలో కలెక్టర్ పమేలా సత్పతి తన మనో భావాలను షేర్ చేసుకున్నారు. ఇందుకు సంబంధించి ఇంగ్లీష్ కొటేషన్ ను ఆమె షేర్ చేసిన కొద్ది సేపటికే డిలిట్ చేశారు. ఆ పోస్టును బట్టి గమనిస్తే మాత్రం కలెక్టర్ మానసికంగా వేధనకు గురువుతున్నారన్న అభిప్రాయాలు వ్యక్తం అవుతున్నాయి. గన్ మెన్లు తప్పి చేసిన విషయంపై తనను మంత్రి మాటలు అన్నారన్న ఆవేదన చెందినట్టుగా కలెక్టరేట్ వర్గాలు కూడా చెప్తున్నాయి. నేను స్త్రీని అన్నింటిని తట్టుకుని అందుకు తగినట్టుగా నడుచుకుంటానన్న ఉద్దేశ్యంతో ఆమె ఈ పోస్టు చేసి ఉంటారని అంటున్నారు. ‘‘నేను మహిళను, మండి పడగలను… వికసించగలను… విరుచుకపడగలను… మంచులా గడ్డకట్టిపోగలను అవసరమైతే కరిగిపోగలను’’ అంటూ ఇంగ్లీష్ లో ఉన్న కొటేషన్ ను షేర్ చేయడంపై పెద్ద ఎత్తున చర్చ జరుగుతోంది. అయితే కొద్దిసేపటి తరువాత ఈ పోస్ట్ డిలిట్ కావడంతో ఏ కారణం చేత డిలిట్ చేశారోనన్న చర్చ కూడా జరుగుతోంది.
రాత్రి మెమోలు…
ఇకపోతే మంత్రుల పర్యటన సందర్భంగా జిల్లాలో పనిచేస్తున్న వివిధ విభాగాల అధికారులకు శ్రీ ముఖాలు అందాయి. ఈ మేరకు జిల్లా కలెక్రట్ పమేలా సత్పతి శనివారం రాత్రి మెమోలు జారీ చేశారు. శుక్రవారం కేంద్ర పట్టణాభివృద్ధి, విద్యుత్, గృహ నిర్మాణ శాఖ మంత్రి మనోహర్ లాల్ కట్టర్ పర్యటన సందర్భంగా సమన్వయ లోపం కారణంగా ఇబ్బందులు తలెత్తాయని, ఈ సందర్భంగా సిబ్బందికి విధులు కేటాయించిన అసిస్టెంట్ కరీంనగర్ టౌన్ ఏసీపీ, ఎస్సీ కార్పొరేషన్ ఈడీ, డిస్ట్రిక్ యూత్, స్పోర్ట్స్ ఆఫీసర్, జిల్లా సంక్షేమ అధికారి, జిల్లా విద్యాధికారి, డీఆర్డీఓలకు మెమోలు జారీ చేశారు. ఇందుకు సంబంధించి వివరణ ఇవ్వాలని కూడా ఆ మెమోలో ఆదేశించారు కలెక్టర్.
