అటెండ్ కానున్న ఎమ్మెల్సీ కవిత
లిక్కర్ స్కాంలో సౌత్ గ్రూప్ పాత్రపై ఆరా తీస్తున్న ఈడీ విచారణకు మరోసారి హాజరయ్యేందుకు బీఆర్ఎస్ ఎమ్మెల్సీ కల్వకుంట్ల కవిత సమాయత్తం అయినట్టుగా తెలుస్తోంది. ఢిల్లీ లిక్కర్ స్కాం మనీ లాండరింగ్ కేసులో ఈడీ విచారణకు వెల్లేందుకు నిర్ణయించుకున్నట్టుగా సమాచారం. ఈ రోజు 11:30 గంటలకు అరుణ్ పెళ్ళై, కవితలను సంయుక్తగా ఈడీ ప్రశ్నించనున్నట్టు సమాచారం, ప్రివెన్షన్ ఆఫ్ మనీ లాండరింగ్ యాక్ట్ సెక్షన్ 50 ప్రకారం కవిత స్టేట్ మెంట్ రికార్డు చేసేందుకు ఈడీ అధికారులు సర్వం సిద్దం చేసుకున్నట్టు సమాచారం. ఢిల్లీ లిక్కర్ స్కాం మనీ లాండరింగ్ కేసులో అనుమానితురాలిగా ఆరోపణలు ఎదుర్కొంటున్న కవిత నుండి ఈ లావాదేవీల్లో సౌత్ గ్రూప్ పాత్ర ఎంత మేర ఉంది ఎవరెవరి ప్రమేయం ఉంది అన్న ప్రశ్నలు అడిగే అవకాశాలు ఉన్నాయి. అలాగే 100 కోట్ల ముడుపుల వ్యవహారం, నిందితులతో ఉన్న సంబంధాలు, డీలర్ల కమిషన్ పెంచడం వెనక కారణాలు ఏంటీ అన్న ప్రశ్నలు ఎమ్మెల్సీ కవితను ఈడీ సంధించే అవకాశాలు కనిపిస్తున్నాయి. లిక్కర్ వ్యాపారులకు అనుకూలంగా పాలసీలో మార్పులు చేర్పులు చేసేందుకు ఢిల్లీ, హైదరాబాద్ లలో నిర్వహించిన సమావేశాల్లో చర్చించిన అంశాల గురించి ఈడీ ఇంటరాగేషన్ టీం కవితను ప్రశ్నించనుందని తెలుస్తోంది. ఇప్పటికే కవిత బ్యాంక్ స్టేట్ మెంట్స్ తో పాటు పలు వివరాలు ఇవ్వాలని ఈడీ అడగగా ఇందుకు సంబందించిన 12 డాక్యుమెంట్లను కవిత అందజేశారు. ఈ నెల 11న విచారణ జరిపినప్పుడు కవిత మొబైల్ ఫోన్ ను కూడా స్వాధీనం చేసుకున్న ఈడీ దీని ద్వారా సేకరించిన వివరాలను కూడా అడిగి తెలుసుకునే అవకాశం ఉంది. రికవరీ సాఫ్ట్ వేర్ తో పాటు ఇతరాత్ర టెక్నాలజీ సాయంతో రికార్డెడ్ ఎవిడెన్స్ కూడా ఈడీ సేకరించే పనిలో నిమగ్నం అయినట్టు సమాచారం. ఇప్పటికే కొంతమేర వివరాలను సేకరించిన ఈడీ వాటి ఆధారంగా కవితను ప్రశ్నించనున్నట్టు తెలుస్తోంది. అయితే ఎమ్మెల్సీ కవిత మాత్రం స్ట్రాంగ్ కౌంటర్ ఇస్తున్నారు. లిక్కర్ స్కాంకు తనకు ఎలాంటి సంబంధం లేదని, అందులో తన పాత్ర అసలే లేదని వాదిస్తున్నారు. ఎవరో ఎవరో ఇచ్చిన వాంగ్మూలం ఆధారంగా కావాలనే తనను ఇరికిస్తున్నారని మండిపడుతున్నారు. కేంద్రంలో అధికారంలో ఉన్న బీజేపీ ప్రభుత్వం దర్యాప్తు సంస్థల ద్వారా కక్ష సాధింపు చర్యలకు పాల్పడుతోందని కవిత ఆరోపిస్తున్నారు. ఈ నేపథ్యంలో రెండో సారి కవిత విచారణకు హాజరవుతున్న నేపథ్యలో సర్వత్రా ఉత్కంఠత నెలకొంది.
