Munugode Bypoll హీట్ రోజురోజుకూ పెరుగుతోంది. రాజకీయ పార్టీలన్నీ పోటాపోటీగా ప్రచారం నిర్వహిస్తున్నారు. గెలుపే లక్ష్యంగా ప్రధాన పార్టీల అభ్యర్థులు వ్యుహాలు రచిస్తున్నారు. నేతలపై వ్యక్తిగత విమర్శల దాడితో పాటు ఆస్తుల ధ్వంసం సాగుతోంది. చండూరులోని కాంగ్రెస్ పార్టీ కార్యాలయానికి (Chanduru Congress party office) గత రాత్రి గుర్తు తెలియని దుండగులు నిప్పు పెట్టగా… బీజేపీ (BJP) అభ్యర్ధి కోమటిరెడ్డి రాజగోపాల్ రెడ్డికి వ్యతిరేకంగా రాత్రికి రాత్రికి అంటించిన వాల్ పోస్టర్లు తీవ్ర కలకలం రేపుతున్నాయి.
Munugode Bypoll తెలంగాణలో పొలిటికల్ హీట్ పెంచుతోంది. నామినేషన్ల పర్వం మెుదలు కావటంతో మునుగోడులో రాజకీయం రసవత్తరంగా మారింది. ప్రధాన పార్టీలకు చెందిన ముఖ్య నేతలు నియోజకవర్గంలోనే మకాం వేసి ఎప్పటికప్పుడు పరిస్థితులను గమినిస్తున్నారు. అధికార టీఆర్ఎస్ (TRS), కాంగ్రెస్ (Congress), బీజేపీ (BJP) విజయమే లక్ష్యంగా వ్యూహాలు, ప్రతి వ్యూహాలు, ఆరోపణలు, ప్రత్యారోపణలు, విమర్శలు, ప్రతి విమర్శలు చేస్తూ రాజకీయ సమరంలో కత్తులు దూస్తున్నారు. నేతలపై వ్యక్తిగత విమర్శల దాడితో పాటు ఆస్తుల ధ్వంసం సాగుతోంది.
చండూరులోని కాంగ్రెస్ పార్టీ కార్యాలయానికి (Congress office on fire) గత రాత్రి గుర్తు తెలియని దుండగులు నిప్పు పెట్టారు. కార్యాలయంలోని పార్టీ కండువాలు, బ్యానర్లు, ఎన్నికల ప్రచార సామాగ్రి దగ్ధమైంది. కాంగ్రెస్ కార్యాలయం నుంచి మంటలు ఎగిసి పడటంతో అప్రమత్తమైన కార్యకర్తలు అగ్నిమాపక సిబ్బందికి సమాచారం అందించారు. అనంతరం పోలీసులకు ఫిర్యాదు చేశారు. నిందితులను వెంటనే పట్టుకుని కఠినంగా శిక్షించాలని డిమాండ్ చేశారు. కాంగ్రెస్ పార్టీ నేతల ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.మునుగోడులో కాంగ్రెస్ పార్టీకి వస్తున్న ఆదరణను చూసి తట్టుకోలేక ప్రత్యర్థులు దుష్ట చర్యలకు పాల్పడుతున్నారని కార్యకర్తలు మండిపడుతున్నారు.
ఈ చర్యలను టీ పీసీసీ (TPCC) అధ్యక్షుడు రేవంత్ రెడ్డి (Revanth Reddy) తీవ్రంగా ఖండించారు. బాధ్యులపై కఠిన చర్యలు తీసుకోవాలని ఆయన డిమాండ్ చేశారు. పార్టీ దిమ్మెలు కూల్చినా, పార్టీ కార్యాలయాలు తగులబెటినా.. మునుగోడు గడ్డపై ఎగిరేది కాంగ్రెస్ జెండానే అని ఆయన స్పష్టం చేశారు. ఇలాంటి దుర్మార్గపు చర్యలతో కాంగ్రెస్ గెలుపును ఆపలేరన్నారు. ఇవాళ చండూర్లో రేవంత్ సభ జరగనుంది. ఈ నేపథ్యంలో కాంగ్రెస్ పార్టీ ఆఫీసుకు దుండగులు నిప్పు పెట్టడం రాజకీయంగా కలకలం సృష్టించింది.
ఇదిలా ఉండగా.. ఉప ఎన్నికకు కారణమైన బీజేపీ అభ్యర్ధి కోమటిరెడ్డి రాజగోపాల్ రెడ్డికి (Komatireddy Rajagopal Reddy) వ్యతిరేకంగా చండూరు మండల కేంద్రంలో రాత్రికి రాత్రికి అంటించిన వాల్ పోస్టర్లు (Wall Posters) తీవ్ర కలకలం రేపుతున్నాయి. ఫోన్ పే తరహాలో కాంట్రాక్ట్ పే (Contract pay) అంటూ రాత్రికి రాత్రే పోస్టర్లు వెలిశాయి. రూ.18 వేల కాంట్రాక్ట్ కోమటిరెడ్డి రాజగోపాల్ రెడ్డికే కేటాయించడం జరిగిందంటూ BJP18THOUSANDCRORES అనే ట్రాన్సక్షన్ ఐడీని ఫోన్ పే తరహాలో డిజైనే చేసిన వాల్ పోస్టర్లను ప్రింట్ చేసి గోడలకు అంటించారు. పైగా 500 కోట్ల బోనస్ సంపాదించారంటూ పోస్టర్ రాశారు. ఈ పోస్టర్ల వ్యవహారం. చండూరు కాంగ్రెస్ పార్టీ కార్యాలయానికి నిప్పు పెట్టడటం రాజకీయ దుమారానికి కారణయ్యాయి.
