తెలుగు రాష్ట్రాల్లో సంచలనం సృష్టించిన నవీన్ హత్యకేసులో ఫోన్ కాల్ రికార్డ్‌ వైరల్ అవుతోంది. నవీన్‌ను హత్యచేసిన అనంతరం హరిహర కృష్ణ.. తన ఫ్రెండ్‌తో ఫోన్‌తో మాట్లాడిన ఆడియో బయటకు వచ్చింది. నవీన్‌ను హత్య చేసి ఏమి తెలియనట్లుగా హరిహర మాట్లాడిన తీరు అశ్చర్యానికి గురిచేస్తోంది. తన ప్రేయసి విషయంలో తగాదా వచ్చిందని డ్రగ్స్ తాగుతానని నవీన్ అన్నట్లు హరిహర చెప్పాడు.
హరిహర ఫోన్‌లో మాట్లాడుతూ.. నవీన్ ఎక్కడున్నాడో తెలియట్లేదు అన్న. వాళ్లింట్లో వాళ్లు నాకు ఫోన్ చేసి ఏడుస్తున్నారు. నా దగ్గరకి వచ్చి వెళ్లిపోయాడు. నీకేమన్నా తెలిస్తే చెప్పు అన్న. అంటూ నవీన్ స్నేహితుడితో హరిహర కృష్ణ మాట్లాడాడు. నవీన్‌కు డ్రగ్స్, గంజాయి, ఆల్కహాల్ అలవాట్లున్నాయని పేర్కొన్నాడు. అవతలి వ్యక్తి నవీన్ తన ప్రియురాలి కోసమే వచ్చినట్టున్నాడు. ఇప్పుడు కనిపించకపోవడం ఏంటి ? మిస్సింగ్ కేసు పెడదామా మరి అనే సరికి.. అలా ఏం వద్దు అని హరిహర అన్నాడు.
రంగారెడ్డి జిల్లా అబ్దుల్లాపూర్‌మెట్‌లో శనివారం దారుణ ఘటన వెలుగు చూసిన సంగతి తెలిసిందే. తాను ప్రేమించిన యువతికి నవీన్ దగ్గర అవడాన్ని హరిహర జీర్ణించుకోలేకపోయాడు. దీంతో నవీన్‌పై కోపం పెంచుకున్నాడు. ఫ్రెండ్స్‌తో గెట్‌ టుగెదర్‌ ఉంది రమ్మని పిలిచాడు. నిర్మానుష్య ప్రాంతానికి తీసుకెళ్లి కత్తితో పొడిచి చంపేశాడు. తర్వాత గుండె, తల, మొండెం, కాళ్లు చేతులను వేరుచేసి.. వాటి ఫొటోలను వాట్సాప్‌ ద్వారా ప్రియురాలికి పంపి పైశాచికానందం పొందాడు. మృతుడు, నిందితుడు ఇద్దరూ స్నేహితులు, ఇంజనీరింగ్‌ విద్యార్థులు కావడం, ప్రేమ విషయం హత్యకు దారితీయడం కలకలం రేపింది.
నవీన్ హత్య కేసులో మూసారంబాగ్ కు చెందిన హరిహర కృష్ణను పోలీసులు అరెస్ట్ చేశారు. అతనిపై ఐపీసీ 302, 301లతో పాటు పలు సెక్షన్ల కింద కేసులు నమోదు చేశారు. అబ్దుల్లాపూర్‌మెట్ పీఎస్ పరిధిలో జరిగిన ఈ హత్యోదంతంలో షాకింగ్ విషయాలు బయటపడుతున్నాయి.
