తెలుగునాట హాట్ టాపిక్
బుల్లి తెర ప్రేక్షకులను ఆకట్టుకున్న ప్రోగ్రామ్ లో అత్యంత పాపులర్ షో జబర్దస్త్. ఈటీవీ ప్రేక్షకులను టీవీల ముందు కట్టిపడేయడంలో భారీ సక్సెస్ అందుకుంది. ఈ షోకు ఎంత ప్రాధాన్యత ఉందో ఈ ప్రాగ్రాంకు జడ్జీలుగా వ్యవహరించిన నాగబాబు, రోజాలు కూడా అదే స్థాయిలో తమ బ్రాండ్ క్రియేట్ చేశారు. వీరిద్దరు వేర్వేరు షోలకు మారిపోయిన తరువాతే ఈ షో కొంతమేర చప్పబిపోయిందన్న చర్చ కూడా సాగుతోంది. నాగబాబు పంచులు వేయడం… రోజా కవర్ నవ్వుతూ నాగబాబు భుజంపై చేయి వేసి జోక్ చెప్పడం వంటి చర్యలతో వీరిద్దరి కాంబినేషన్ ను కూడా టీవీ ప్రేక్షకులు అలరించారు. వైఎస్సార్సీపీలో కొనసాగుతున్న రోజా, జనసేన చీఫ్ పవణ్ కళ్యాణ్ అన్న నాగబాబులు ఏనాడు కూడా ఈ వేదికపై తమ పొలిటికల్ ఇంట్రస్ట్ ను ప్రదర్శించలేదు. అయితే తాజాగా వీరిద్దరు ఒకరిపై ఒకరు చేసుకుంటున్న విమర్శలు గమనించిన వారంతా నిన్న మొన్నటి వరకు బుల్లితెరపై నవ్వులు పండించిన కార్యక్రమానికి న్యాయ నిర్ణేతులగా వ్యవహరించిన వారేనా అని అనుకుంటున్నారు.
ఇంతకీ ఏం జరిగిందంటే…
ఆర్ కె రోజా ఏపీలో వైఎస్ జగన్ మోహన్ రెడ్డి క్యాబినెట్ లో టూరిజం మినిస్టర్ గా బాధ్యతలు చేపట్టారు. మినిస్టర్ గా ప్రమాణ స్వీకారానికి ముందే తానిక ఎలాంటి షోల్లో కనిపించబోనని ప్రకటించారు. నాగబాబు కూడా జీటీవీలో మరో షోలో జడ్జిగా వ్యవహరిస్తున్నారు. ఇంతవరకు బాగానే ఉన్నా ఏపీలో చోటు చేసుకున్న రాజకీయ పరిణామాలతో వీరిద్దరి మధ్య ఇప్పుడు మాటల యుద్దం కొనసాగుతోంది. కొద్ది రోజులుగా జనసేన అధినేత పవన్ కళ్యాణ్ టీడీపీతో చెలిమి చేస్తూ వైసీపీపై మండిపడుతున్నారు. రాష్ట్రంలో వైసీపీ పాలనను ఎండగడుతున్న పవన్ కళ్యాణ్ కు కౌంటర్ గా వైసీపీ నాయకులు కూడా కౌంటర్ అటాక్ చేస్తున్నారు. ఈ క్రమంలో క్యాబినెట్ మంత్రిగా ఉన్న రోజా కూడా జనసేన చీఫ్ పై దాడికి పూనుకున్నారు. తాజాగా నందమూరి బాలకృష్ణతో కలిసి పవన్ కళ్యాణ్ రాజకీయ ప్రయాణం చేసే దిశగా అడుగులు వేస్తుండడంతో వైసీపీ నాయకుల దాడులు మరింత ఎక్కువయ్యాయి.
అన్నకు చెల్లి… తమ్మునికి అన్న…
జబర్దస్త్ షోలో ఒకే మాట ఒకే నిర్ణయం అన్నట్టుగా వ్యవహరించిన నాగబాబు, రోజాలు ఇప్పుడు పరస్పర విమర్శలకు దిగారు. రోజా నోటిని మునిసిపల్ చెత్త తొట్టితో నాగబాబు పోల్చిన వీడియో వైరల్ అయింది. అంతేకాకుండా ఏపీ టూరిజం ర్యాంకింగ్ దేశంలో 17వ స్థానంలో ఉందని, రోజా పదవి కాలం ముగిసే సరికి ఈ ర్యాంకు పూర్తిగా పడిపోతుందంటూ నాగబాబు కామెంట్ చేశారు. తమ్ముడు పవన్ కళ్యాణ్ పై రోజా చేస్తున్న విమర్శలు తట్టుకోలేకపోయిన నాగబాబు ఆ పార్టీ ముఖ్య నాయకుని హోదాలో ఈ వ్యాఖ్యలు చేశారు. అయితే ఇదే సమయంలో జగనన్నకు చెల్లిగా వైసీపీలో గుర్తింపు పొందిన రోజా కూడా కౌంటర్ అటాక్ చేసిందనే చెప్పాలి. వ్యక్తిగత దూషణలకు దిగడం సరికాదని నాగబాబుకు హితవు పలుకుతూనే గతంలో జనసేన క్యాడర్ గురించి బాలయ్య చేసిన కామెంట్లను గుర్తు చేస్తూ ట్విట్ చేశారు. దీంతో జబర్దస్త్ మాజీ జడ్జీల మధ్య మాటల యుద్దం మొదలైందా అన్న చర్చ మొదలైంది.
