జూబ్లీహిల్స్ పెద్దమ్మ గుడి వద్ద పడిపోయిన బాధితురాలు
ఆసుపత్రికి తరలించిన పోలీసులు
దిశ దశ, హైదరాబాద్:
బెల్లంపల్లి ఎమ్మెల్యే దుర్గం చిన్నయ్యపై ఆరోపణలు చేసిన బాధితురాలు శేజల్ కొద్ది సేపటి క్రితం ఆత్మహత్యా యత్నం చేసుకున్నారు. హైదరాబాద్ జూబ్లీహిల్స్ పెద్దమ్మగుడి వద్ద అపస్మారక స్థితిలో పడిపోయి ఉన్న శేజల్ ను గమనించిన స్థానికులు సమీపంలో ఉన్న ట్రాఫిక్ పోలీసులకు సమాచారం ఇచ్చారు. వెంటనే అక్కడకు చేరుకున్న పోలీసులు ఆమె వద్ద లభ్యమైన నెంబర్లకు కాల్ చేసి సమాచారం అందించారు. అపస్మారక స్థితిలో ఉన్న ఆమెను ఆటోలో అపోలో ఆసుపత్రికి తరలిస్తున్నామని పోలీసులు తెలిపారు. ఓ డెయిరి విషయంలో చోటు చేసుకున్న విబేధాలతో శేజల్ అంశం వెలుగులోకి వచ్చింది. ఎమ్మెల్యే దుర్గం చిన్నయ్య వాట్సప్ ఛాటింగ్స్ తో పాటు ఇతరాత్ర ఆధారాలను విడుదల చేయడంతో పాటు ఆమె స్వయంగా ఆడియోను కూడా విడుదల చేశారు. ఈ క్రమంలో స్థానిక పోలీసులు కూడా తనకు న్యాయం చేయలేదంటూ ఆరోపణలు చేసిన శేజల్ ఢిల్లీకి వెల్లి జాతీయ మహిళా కమిషన్ ను కూడా ఆశ్రయించారు. ఇటీవల ఢిల్లీలో ఉన్న బీఆర్ఎస్ ఎంపీలను కూడా కలిసే ప్రయత్నం చేస్తే ఆమెకు అపాయింట్ మెంట్ ఇవ్వలేదని కూడా శేజల్ ఆరోపించారు. అయితే రెండు రోజుల క్రితం రాష్ట్ర మంత్రి కేటీఆర్ ఓ టీవీ ఛానెల్ లో ఇచ్చిన ఇంటర్వ్యూలో శేజల్ చేస్తున్న ఆరోపణల్లో వాస్తవం లేదని, లైంగిక వేదింపులకు గురి కాలేదని వెల్లడించారు. మంత్రి ఇంటర్వ్యూ పూర్తయిన కొద్దిసేపట్లోనే శేజల్ ఓ వీడియోను విడుదల చేసి తాను ఆధారాలు చూపిస్తానని, సీఎం కేసీఆర్, మంత్రి కేటీఆర్ లను నమ్ముకున్నానని ఆవేదన వ్యక్తం చేశారు. ఈ నేపథ్యంలో శేజల్ తన తప్పయితే ఎలాంటి శిక్ష విధించినా సిద్దమేనని, దోషులుగా తేలిన వారిపై శిక్ష వేయాలని కూడా డిమాండ్ చేశారు. అయితే అనూహ్యంగా గురువారం మద్యాహ్నం ఆమె జూబ్లీహిల్స్ పెద్దమ్మ గుడి వద్ద అపస్మారక స్థితిలో పడి ఉండడం సంచలనంగా మారింది.
ఇది రెండో సారి…
శేజల్ ఆత్మహత్యాయత్నానికి పాల్పడడం ఇది రెండో సారి. ఇదే బెల్లంపల్లి ఎమ్మెల్యే చిన్నయ్యపై ఆరోపణలు చేసిన తరువాత ఓ సారి ససైడ్ అటెమ్ట్ చేసుకోగా తాజాగా నిద్ర మాత్రలు మింగి మరోసారి శేజల్ ఆత్మహత్యాయత్నానికి ప్రయత్నించారు. అయితే గురువారం శేజల్ ను గురువారం ఉదయం పెద్దమ్మ గుడివద్ద వేరే వ్యక్తి దింపి వెళ్లాడని తెలుస్తోంది. అతని నుండి వివరాలు సేకరిస్తే మరిన్ని విషయాలు వెలుగులోకి వచ్చే అవకాశం ఉంది. అంతేకాకుండా శేజల్ తన హ్యాండ్ బ్యాగులో సూసైడ్ నోట్ కూడా రాసి పెట్టారు.
