దిశ దశ, కరీంనగర్:
లంకేయుని రాజ్యంలో పుట్టిన ఆ బిడ్డ రాముని పాదం తాకిన నేలన అడుగుపెట్టింది. లండన్ లో ప్రేమించిన ఆ వధువు రాముడుగులోని మెట్టినింటికి చేరారు. ప్రేమించుకుని పెళ్లి చేసుకున్న ఆ దంపతులు కూడా ఈ ప్రత్యేకతలను గమనించకపోవచ్చు. అనుకోకుండానే ఏర్పడిన ఈ ఆత్మీయ బంధం ఏడడుగులు… మూడు ముళ్లు… నూరేళ్ల జీవితంతో పెనవేసుకుంది. కరీంనగర్ జిల్లా కేంద్రంలో బుధవారం పెళ్లి తంతుతో ఒక్కటైన ఆ ప్రేమ జంట ఎన్నెన్నో ప్రత్యేకతలను సంతరించుకుంది. కరీంనగర్ జిల్లా రామడుగు మండలం పందుకుంటపల్లికి చెందిన కటుకం సురేందర్ ఉపాధి కోసం లండన్ లో జీవనం సాగిస్తున్నారు. 2018 నుండి అక్కడే ఉద్యోగం చేస్తున్న సురేందర్ కు శ్రీలంకకు చెందిన జాను శిఖతో పరిచయం ఏర్పడింది. ఈ పరిచయం కాస్తా ప్రేమ వరకు చేరడంతో మనసులు కలిసిన వీరద్దరు వైవాహిక బంధంతో జీవితాంతం కలిసి బ్రతకాలని నిర్ణయించుకున్నారు. ఈ విషయాన్ని వీరిద్దరు కూడా తమ కుటుంబాల్లోని పెద్దలకు చెప్పి ఒప్పించారు. ఇరు కుటుంబాలకు చెందిన వారు కూడా సురేందర్, జానుశిఖల కోరికలను ఆశీర్వదించేందుకు సుముఖత వ్యక్తం చేశారు. అందరి ఆమోంతో జరిగిన ఈ పెళ్లి వేడుకను కరీంనగర్ లో బుధవారం ఘనంగా నిర్వహించారు. వదూవరులను మంత్రి పొన్నం ప్రభాకర్ తో పాటు పలువురు ప్రముఖులు కూడా ఆశీర్వదించారు.
మెట్టినింటి సాంప్రాదాయంతో…
సురేందర్ జీవిత భాగస్వామిగా ఉండాలని నిర్ణయించుకున్న జాను శిఖ మెట్టినింటి సాంప్రాదాయలను కూడా గౌరవించారు. సురేందర్ పూర్వీకుల నుండి సాంప్రాదాయబద్దంగా సాగుతున్న తీరుకు అనుగుణంగా పెళ్లి చేసుకునేందుకు ముందుకు రావడం విశేషం. దీంతో హైందవ ఆచార వ్యవహారాల ప్రకారం నిర్వహించిన వివాహంతో సురేందర్, జాను శిఖలు ఒక్కటయ్యారు. అయితే రామాయంణంలో రావణుడి రాజ్యమైన శ్రీలంకకు చెందిన యువతి… అరణ్య వాసం చేసినప్పుడు శ్రీరాముడు నడియాడిన నేల అయిన రామడుగుకు చెందిన యువకుడు ప్రేమించి పెళ్లి చేసుకోవడం యాధృచ్ఛికంగా జరిగినప్పటికీ ఈ ప్రత్యేకతలు కూడా వారు సొంతం చేసుకున్నారు.
