రికార్డు కలెక్షన్లతో దూసుకుపోతున్న‘కాంతారా’ మూవీ బ్రహ్మాండంగా ఉందంటూ కేంద్ర మంత్రి నిర్మలా సీతారామన్ కితాబిచ్చారు. ఈ మేరకు సినిమా చాలా బాగుందంటూ ట్వీట్ చేశారు. బెంగళూరులో వాలంటీర్లు, శ్రేయోభిలాషులతో కలిసి థియేటర్ లో కాంతారా సినిమా చూసినట్లు వెల్లడించారు. తులువనాడు, కరావళి ప్రాంతంలోని సంప్రదాయాలకు కాంతారా ప్రతీకగా నిలిచిందని, ఆ ప్రాంత సాంప్రదాయాలను చిత్రీకరించడంపై ప్రత్యేక శ్రద్ద వహించారన్నారు. ఈ సినిమాను తెరకెక్కించిన రిషబ్ షెట్టిపై కేంద్ర మంత్రి పొగడ్తల వర్షం కురిపించారు. థియేటర్‌లో దిగిన ఫొటోను కేంద్రమంత్రి షేర్‌ చేశారు. ప్రాంతాలు, భాషలకు అతీతంగా కాంతారా రికార్డు కలెక్షన్లు రాబడుతోంది. ప్రపంచవ్యాప్తంగా కాంతారా కలెక్షన్ల రికార్డులను తిరగరాస్తోంది. తెలుగులో ఇప్పటికే ఈ సినిమా రూ. 50 కోట్లు వసూలు చేసింది. ప్రపంచవ్యాప్తంగా ఏకంగా రూ. 300 కోట్లకు పైగా కలెక్షన్లు పొంది అరుదైన రికార్డును దక్కించుకుంది.
