బట్టి పట్టినా చిక్కని ‘‘బట్టి కొట్టు’’ భూమి కథ…

సర్కారు కొన్న భూమిని కూడా విక్రయించారా..?

దిశ దశ, మహదేవపూర్:

ఓ వైపున ప్రభుత్వ భూమి లేదని, సంక్షేమ పథకాల అమలు చేయాలంటే ఇబ్బందిగా మారిందని అధికారులు చెప్తుంటే… మరో వైపున డబ్బులు పెట్టి కొనుగోలు చేసిన భూమిని కూడా రక్షించే పరిస్థితి లేకుండా పోయింది. సాక్షాత్తు మండల కేంద్రమైన మహదేవపూర్ లో హాట్ కేక్ లా మారిన కేవలం 3 సర్వే నెంబర్లకు సంబంధించిన భూమి వివరాలను పరిశీలిస్తే ఇక్కడ సర్కారు నిధులు ఎలా దుర్వినియోగం అవుతున్నాయో అర్థం అవుతుంది. ఆల్ ఇండియా అంబేడ్కర్ యువజన సంఘం మండల అధ్యక్షుడు మేరుగు లక్ష్మణ్ వివిధ శాఖల నుండి సమాచార హక్కు చట్టం ద్వారా సేకరించిన వివరాలు గమనిస్తే విస్తుపోయే నిజాలు బయటపడుతున్నాయి. మహదేవపూర్ కు చెందిన
ఖాజా మోహినోద్దిన్ పేరిట 459, 463, 464 సర్వే నెంబర్లలోని 38 ఎకరాల భూమి ఉంది. ఈ భూమిలో కొంత భాగం 1980లో ఫైల్ నంబర్ govt memo no: 3114-K2/79-5, 9-9-1980లో భూమి కొనుగోలుకు సంబంధించిన ఫైల్ ను అప్పటి కరీంనగర్ జల్లా కలెక్టర్ అప్రూవల్ చేశారు. 1988లో ఫైల్ నంబర్ B/2044/88 మరో ఫైల్ ద్వారా భూమిని కొనుగోలు చేసినట్టుగా స్పష్టం అవుతోంది. కరీంనగర్ ఎస్సీ కార్పోరేషన్ ద్వారా file no E/110/99 కొనుగోలు చేసినట్టు రికార్డు ఉంది. అయితే ఈ సర్వే నంబర్లలోని భూమిని 176 మంది నిరుపేద నిరుపేదలకు నివేశన స్థలం కోసం పట్టాలు ఇచ్చినట్టు రెవెన్యూ రికార్డులు చెప్తున్నాయి. ఇందుకు సంబంధించిన లే ఔట్ కూడా తయారు చేసిన అధికారులు రెండు నిలువు, ఆరు అడ్డ రోడ్లను నిర్మించాలని, 4 గుంటల్లో వాటర్ ట్యాంక్ నిర్మించాలని, 24 గుంటల్లో కమ్యూనిటీ అవసరాలకు వినియోగించాలని కూడా ప్రతిపాదించారు. ఒక్కో ప్లాటు సైజ్ 33/33 పీట్లుగా, రహదారులు 20, 30 ఫీట్ల వెడల్పులో వేయాలని ప్రతిపాదించారు. అయితే ఈ భూమిలో లబ్దిదారులు ఇండ్లు నిర్మించకోలేదని ఈ పట్టాలను రద్దు చేస్తూ 2004లో ఉత్తర్వులు వెలువడ్డాయి. ఇందిరమ్మ ఫేజ్ 3 కింద 463సర్వే నెంబర్ లో నోటిఫికేషన్ జారీ ప్రభుత్వం 7.37 ఎకరాల భూమిని మహదేవపూర్ తహసీల్దార్ ఆఫీసు ద్వారా కొనుగోలు చేశారు. ఫైల్ నంబర్: G3/6626/2007లో కొనుగోలు చేసి ఈ భూమిలో ఇందిరమ్మ ఇండ్ల నిర్మాణం చేపట్టాలని నిర్ణయించారు. కానీ ఈ భూమిలో ఇందిరమ్మ ఇండ్ల నిర్మాణం జరగకపోగా ఆ భూమి మాత్రం ప్రభుత్వ ఆధీనంలోనే ఉంది. ఖాజా మొహినొద్దీన్ వారసుడు సిద్దిఖ్ అహ్మద్ వద్ద సింగినేని ఎర్రయ్య బొమ్మన స్వాతి, 2008లో కొనుగోలు చేశారని రెవెన్యూ అధికారులు డబ్బులు కూడా వీరికి చెల్లించారు. అయితే 463 సర్వే నెంబర్ లో 7.37 ఎకరాల భూమిని ఇందిరమ్మ ఇండ్ల కోసం కొనుగోలు చేసేందుకు ప్రతిపాదనలు సిద్దం చేసినప్పుడు పట్టదారు అయినా ఖాజా మోహినోద్దీన్ స్థానికంగా లేరని భావించిన రెవెన్యూ అధికారులు ప్రభుత్వ కార్యాలయాల వద్ద నోటీసులు అంటించారు. ఇందుకు స్పందించినా ఖాజా సిద్దిఖ్ అహ్మద్ తనతో పాటు మరో ఏడుగురు వారసులం ఉన్నామని వివరిస్తూ రెవెన్యూ అధికారులకు దరఖాస్తు చేసుకున్నారు. దీంతో ఈ పట్టాదారులు ఈ భూమిని వారసులకు భాగాలు చేయడంతో సన్నకారు రైతులుగా గుర్తించాల్సి వస్తున్నందున వారికి ఇవ్వవలసిన డబ్బును చెల్లించాలని మంథని ఆర్డీఓ జిల్లా కలెక్టర్ కు ప్రతిపాదనలు చేశారు. ఆబ్జక్షన్ నోటీసు ఇచ్చిన ఖాజా మోహినోద్దిన్ వారసుడు ఖాజా సిద్దిఖ్ అహ్మద్ తన కుటుంబ సభ్యులు తనకు పవర్ ఆఫ్ అటార్నీ ఇచ్చారని మంథని సబ్ రిజిస్ట్రేషన్ కార్యాలయంలో ఇతరుల పేరిట భూమిని రిజిస్ట్రేషన్ చేశారు. కొత్తగా రెవెన్యూ రికార్డుల్లోకి చేరిన వారికి పరిహారం చెల్లించాలని కూడా ఒప్పంద పత్రాన్ని ఖాజా సిద్దిఖ్ అహ్మద్, కొనుగోలు దారులు సంబంధిత కార్యాలయంలో సమర్పించడంతో 2008లో సింగినేని ఎర్రయ్యకు 3.37 గుంటలకు గాను రూ. 7.85 లక్షలు, బొమ్మన స్వాతికి 4 ఎకరాలకు గాను రూ. 8 లక్షలు చెల్లించినట్టుగా రికార్డులు చెప్తున్నాయి. ఇదే భూమి మీదుగా చిన్న కాళేశ్వరం ప్రాజెక్టు పైప్ లైన్ వెల్తుందని ఇందుకు గాను 2019లో పీపీపీ నంబర్ 0409 ప్రకారం 14 గుంటల భూమికి సింగినేని ఎర్రయ్య వద్ద కొనుగోలు చేసిన అధికారులు రూ. 4.37 లక్షలు, పీపీపీ నంబర్ 397942/831 బొమ్మన స్వాతి పేరిట ఉన్న 13 గుంటల భూమికి రూ. 4.06 లక్షలు ఇచ్చినట్టుగా భూ సేకరణ విభాగం రికార్డుల్లో ఉంది.

గోదాం కోసం…

2016లో మార్కెటింగ్ విభాగం అధికారులు గోదాము నిర్మించేందుకు 2.21 ఎకరాల భూమిని కెటాయించాలని కోరుతూ రెవెన్యూ అధికారులను కోరారు. అప్పుడు క్షేత్ర స్థాయిలో పరిశీలించి పంచనామ చేసిన మహదేవపూర్ తహసీల్దార్ 463 సర్వే నెంబర్ భూమిలో 1.21 ఎకరాల్లో నెల్లి విజయ ఇటుక బట్టి నిర్వహిస్తున్నారని, లింగాల సమ్మయ్య అనే వ్యక్తి కూడా ఆక్రమించుకున్నారని వారిని ఖాలీ చేయించామని తహసీల్దార్ తన నివేదికలో పేర్కొన్నారు. అంతేకాకుండా 2007-2008లో రెవెన్యూ విభాగంలోని పహాణీలను పరిశీలించగా 8 మంది పట్టాదారుల పేర్లు ఉన్నాయని, విరాసత్ అని అందులో రాసి ఉందని వివరించారు. ప్రభుత్వం కొనుగోలు చేసిన తరువాత కూడా పట్టాదారుల పేరిటనే రెవెన్యూ అధికారులు రికార్డులు మెయింటెన్ చేసినట్టుగా లేఖ నంబంర్ 111/2016 మార్చి 9న మంథని ఆర్డీఓకు వివిరించారు. ముఖ్యంగా ఈ భూమి ప్రభుత్వం కొనుగోలు చేసినప్పటికీ రెవెన్యూ రికార్డుల్లో పట్టాదారుల పేర్లు వస్తున్నాయని వెల్లడించిన తహసీల్దార్ ఈ భూమిలో గోదాము నిర్మాణం చేసినట్టయితే భవిష్యత్తులో న్యాయ సమస్యలు ఎదురవుతాయని చెప్తూ, ఈ భూమిలో మార్కెటింగ్ అధికారులు ఎలాంటి నిర్మాణాలు చేపట్ట వద్దని సూచించారు. ప్రభుత్వం కొనుగోలు చేసినట్టుగా లావాదేవీలకు సంబంధించిన ఫైళ్లు దొరికిన తరువాత కూడా రెవెన్యూ రికార్డుల్లో పట్టాదారుల పేర్లే వస్తున్న విషయాన్ని గమనించి సవరణ చేసి దానిని ప్రభుత్వ భూమిగా పేర్కొనాల్సిన రెవెన్యూ అధికారే లీగల్ ఇష్యూస్ వస్తాయని నివేదికలో పేర్కొనడం విచిత్రంగా ఉంది. ప్రభుత్వం డబ్బులు చెల్లించిన తరువాత కూడా పట్టాదారుల పేరిట రికార్డుల్లో రాస్తున్న సంబంధిత యంత్రాంగంపై క్రమ శిక్షణ చర్యలు తీసుకోవాలని సిఫార్సు చేయకుండా చేతులు దులుపుకునే విధంగా కోర్టు సంబంధిత సమస్యలు ఎదురవుతాయని హెచ్చరిస్తూ నివేదికలో వివరించడం విస్మయం కల్గిస్తోంది. ప్రభుత్వం వివిధ శాఖల నిధులు వెచ్చించి కొనుగోలు చేసిన ఈ భూమిని ఆ తరువాత కూడా స్వాధీనం చేసుకునేందుకు రెవెన్యూ అధికారులు చొరవ తీసుకోకపోవడం కూడా ఆశ్చర్యానికి గురి చేస్తోంది. భవిష్యత్తులో న్యాయ పరమైన చిక్కులు ఎదుర్కొంటామని గుర్తించిన అధికారులు తమ చేతిలో ఉన్న రికార్డుల ఆధారంగా పట్టాదారు వారసులు, వారు విక్రయించిన వారి పేర్లను తొలగించేందుకు అవసరమైన ఉత్తర ప్రత్యుత్తరాలు చేయకపోవడం విడ్డూరం. అయితే 2008లో పట్టాదారు వారసులు భూమిని విక్రయించినట్టుగా రిజిస్ట్రేషన్ డాక్యూమెంట్లు వెల్లడిస్తున్నాయి. అయితే 2016లో ఇదే భూమి వివాదంలో ఉందని, పట్టాదారుల వారసుల పేర్లు రెవెన్యూ రికార్డుల్లో వస్తున్నాయని నివేదికలో వివరించడం విశేషం. విరాసత్ అంటే వారసుల పేరిట మారినట్టుగా రెవెన్యూ రికార్డులు తేల్చి చెప్పినట్టయితే 2007లో ఇందిరమ్మ ఇండ్ల పేరిట భూ సేకరణ జరిపినప్పుడు కానీ, 2019లో చిన్న కాళేశ్వరం ప్రాజెక్టు భూసేకరణ జరిపినప్పుడు కానీ వారసులకు కాకుండా పట్టాదారులకు పరిహారం ఎలా చెల్లించారో అన్న విషయాన్ని తహసీల్దార్ విస్మరించడం గమనార్హం. రిజిస్ట్రేషన్ కార్యాలయ ద్వారా భూమి క్రయ విక్రయాలు జరినట్టుగా రికార్డులు చెప్తున్నపటికీ 2016 వరకు కూడా ఖాజా మోహినోద్దీన్ వారసుల పేర్లే రెవెన్యూ రికార్డుల్లో ఉన్నాయని తహసీల్దార్ తన నివేదికలో పేర్కొన్నారు. అంటే  ఈ లెక్కన పట్టాదారు వద్ద భూమి కొనుగోలు చేసిన వారు రెవెన్యూ రికార్డుల్లో తమ పేరిట మ్యూటేషన్ ఎందుకు చేసుకోలేదన్నదే ప్రశ్నార్థకంగా మారింది. మరో వైపున 2010లో రిజిస్ట్రేషన్ డాక్యుమెంట్ల ఆధారంగా అదే భూమిని ఖాజామోహినోద్దిన్ వారసుల పేరిట కొనుగోలు చేసిన వారు ఇతరులకు విక్రయించినట్టుగా స్పష్టం అవుతోంది. అయితే ప్రైవేటు వ్యక్తులు లావాదేవీలు చేసుకున్నప్పుడు ఎదురు కానీ కోర్టు సంబంధిత సమస్యలు సర్కారు కొనుగోలు చేసిన భూమికి మాత్రం వచ్చే అవకాశం ఉందని తహసీల్దార్ నివేదికలో వెల్లడించడానికి కారణాలు ఏంటన్నది అధికారులే తేల్చాలి. 

అమ్మిందెంతా..?

అయితే బట్టికొట్టు ప్రాంతంలో ఉన్న ఖాజా మోహినోద్దీన్ కు చెందిన ఈ భూమిని పలు దఫాలుగా ప్రభుత్వం కొనుగోలు చేసింది. 1980 నుండి 1999 వరకు విడుతల వారిగా కొనుగోలు చేసిన భూమిలో 176 మంది లబ్దిదారులకు గుంట చొప్పున నివేశన స్థలాలు ఇవ్వడంతో పాటు 28 గుంటల భూమిని కమ్యూనిటీ అవసరాలకు వినియోగించేందుకు, రోడ్ల కోసం మరికొంత భూమిని సేకరించినట్టుగా అయితే లే ఔట్ మ్యాపును బట్టి అర్థం అవుతోంది. మొదటి నిరుపేదలకు భూమిని కెటాయించినట్టుగా చూపిస్తున్న లే ఔట్ మ్యాపును బట్టి నివేశన స్థలాలకు 4.175 ఎకరాలు, కమ్యూనిటీ అవసరాలకు 28 గుంటలు, రోడ్ల కోసం మరికొంత భూమిని కెటాయించినట్టు స్పష్టం అవుతున్నందున ఆరు నుండి 7 ఎకరాలు ఉండవచ్చని అంచనా. తిరిగి 2007 ప్రాంతంలో 7.37 ఎకరాల భూమిని ఇందిరమ్మ మూడో ఫేజ్ ద్వారా ఇండ్ల నిర్మాణం జరిపేందుకు కొనుగోలు చేశారు. అయితే ఖాజా మోహినోద్దీన్ కు సంబంధించిన ఓ సర్వే నెంబర్ లో సేత్వార్ రికార్డుల్లో ఉన్న భూమి కంటే ఎక్కువ భూమిని అతని వారసులు ప్రైవేటు వ్యక్తులకు విక్రయించినట్టుగా రికార్డులు చెప్తున్నాయి. ప్రభుత్వానికి విక్రయించిన భూమితో పాటు ఖాజా మోహినోద్దీన్ వారసులు మొత్తం భూమిని ఇతరులకు విక్రయించినట్టుగా రిజిస్ట్రేషన్ కార్యాలయంలో డాక్యూమెంట్లు క్రియేట్ అయ్యాయి. ఈ లెక్కన సర్కారు సేకరించిన భూమిని కూడా విక్రయించినట్టుగా స్పష్టం అవతుతోంది. ఇందులో అప్పుడు రెవెన్యూ విభాగంలో పనిచేస్తున్న ఉద్యోగి కుటుంబ సభ్యుల పేరిట కూడా కొనుగోలు చేసినట్టుగా రికార్డులు చెప్తున్నాయి. అయితే రికార్డులు ఏమార్చి ప్రభుత్వానికి విక్రయించిన ఈ భూమిని స్వాధీనం చేసుకునేందుకు మాత్రం ఆయా శాఖల అధికారులు చొరవ తీసుకోకపోవడం గమనార్హం. ఓ వైపున పట్టాదారు వారసులు ఈ భూమిని రిజిస్ట్రేషన్ కార్యాలయం ద్వారా క్రయవిక్రయాలు జరుపుతున్నా నిలువరించేందుకు చొరవ తీసుకోకపోవడం విచిత్రం. అంతేకాకుండా ప్రభుత్వ శాఖల కొనుగోలు చేసిన భూమికి సంబంధించిన లావాదేవీలు రద్దు చేసేందుకు అవసరమైన ప్రతిపాదనలు కూడా తయారు చేయకపోవడం వెనక ఉన్న ఆంతర్యం ఏంటన్నదే మిస్టరీగా మారింది. ఉన్నతాధికారులు జోక్యం చేసుకుని ఆయా శాఖల్లో ఉన్న రికార్డులన్నింటిని పరిశీలించి ప్రభుత్వం కొనుగోలు చేసిన భూమిని స్వాధీనం చేసుకుని సంక్షేమ పథకాలకు వినియోగించాలని మేరుగు లక్ష్మణ్ కోరుతున్నారు.