మాజీ కేంద్రమంత్రి, ఖమ్మం మాజీ ఎంపీ, కాంగ్రెస్ సీనియర్ నాయకురాలు రేణుకాచౌదరి కీలక వ్యాఖ్యలతో వార్తల్లో ఉంటూ వస్తోన్నారు. వచ్చే ఎన్నికల్లో పోటీపై ఆమె ఆసక్తికర వ్యాఖ్యలు చేశారు. వచ్చే ఎన్నికల్లో ఖమ్మం అసెంబ్లీ స్థానం నుంచి పోటీ చేయనున్నట్లు స్పష్టం చేశారు. పార్లమెంట్ ఎన్నికలు వచ్చినప్పుడు ఎంపీ అభ్యర్ధిగా పోటీ చేయడంపై ఆలోచిస్తానని తెలిపారు. ఈ సందర్భంగా రేణుకాచౌదరి కీలక విషయం బయటపెట్టారు.
ఏపీలోని గుడివాడ నియోజకవర్గం నుంచి పోటీ చేయాలని కూడా డిమండ్లు వస్తున్నాయని, ఈ విషయాన్ని కూడా ఆలోచిస్తానంటూ రేణుకాచౌదరి చేసిన వ్యాఖ్యలు హాట్ టాపిక్ గా మారాయి. అవసరమైతే రెండు చోట్లా పోటీ చేస్తానని ఆమె తెలిపారు. గతంలో కూడా పలుమార్లు గుడివాడ నుంచి పోటీ చేస్తానంటూ రేణుకాచౌదరి చెప్పుకొచ్చారు. దీంతో మరోసారి అదే విషయాన్ని ఆమె చెప్పడంతో..ఈసారి గుడివాడ నియజకవర్గం నుంచి ఆము పోటీ చేయడం ఖాయమనే ప్రచారం జరుగుతోంది.
గతంలో అమరావతి రైతుల పాదయాత్రకు రేణుకాచౌదరి మద్దతిచ్చారు. అమరావతికి వచ్చి రైతుల పాదయాత్రలో పాల్గొన్నారు. ఈ సందర్భంగా జగన్ పై తీవ్ర విమర్శలు చేశారు. జగన్ లాంటి నాయకుడుని ఎక్కడా చూడలేదని, రైతులను వేధిస్తున్నాడని ఆరోపించారు. వచ్చే ఎన్నికల్లో జగన్ ఓడిపోవడం ఖాయమని చెప్పారు. దీంతో రేణుకాచౌదరి చేసిన వ్యాఖ్యలకు అసెంబ్లీలో కొడాలి నాని కౌంటర్ ఇచ్చారు. ఆమె కార్పొరేటర్ కూడా గెలవలేరని, ఆమె కూడా జగన్ ను విమర్శించడం హాస్యాస్పదంగా ఉందని సెటైర్లు వేశారు.
కొడాలి నాని వ్యాఖ్యలపై స్పందించిన రేణాకాచౌదరి.. వచ్చే ఎన్నికల్లో తాను గుడివాడ నుంచి పోటీ చేసి కొడాలి నానిని ఓడిస్తానంటూ చెప్పుకొచ్చారు. గుడివాడలో తనకు చాలామంది బంధువులు ఉన్నారని అన్నారు.అప్పటినుంచి అనేకసార్లు గుడివాడ నుంచి పోటీ చేస్తానని చెప్పారు ఇఫ్పుడు కూడా అదే విషయాన్ని ఆమె చెప్పడం విశేషంగా మారింది.
